Zabol د ولايتي شوراګانو ټاکنې

کلات (پژواک، ٢٧ لړم ٩٤): د زابل د ولايتي شورا غړي او يو شمېر اوسېدونکي وايي چې د نورو کلونو په پرتله تېر کال د دغه ولايت ولايتي شورا د پام وړ کارونه سرته رسولي دي.
د دوی په خبره چې خپل منځي همغږي، د موکلينو ستونزو ته پر وخت پاملرنه او له دولت سره د ولس د اړيکو نږدېوالى هغه برخې دي چې په کې د ولايتي شورا وکيلان بريالي وو.
د ولايتي شورا وکيلان دا مني چې د ټاکنو پر مهال له خلکو سره کړې ټولې ژمنې يې نه دې عملي کړط خو زياتوي چې امنيتي ستونزې، په دولت کې د اجرااتو لپاره د کلک هوډ نه شتون، په ولايتي کچه بدلونونه هغه څه دي چې د دوی د يو شمېر کارونو مخه يې ډب کړې ده.

لومړى تعقيب- کلات (پژواک، ٩ لړم ٩٤): د زابل امنيتي چارواکي او د ولايتي شورا غړي وايي چې د دوى په هڅو له خاک افغان ولسوالۍ څخه تښتول شوي ١٤ ملکي وګړي بېرته خوشي شوي دي.
د يادونې ده، تېره اونۍ د غزني د جاغورو ولسواليو اوسېدونکو د زابل د خاک افغان ولسوالۍ ١٤ اوسېدونکي په دې تور تښتولي وو چې د خاک افغان وسله والو تېر کال د جاغورو ٣٠ کسان تښتولي وو.
د زابل د ولايتي شورا رييس حاجي عطاجان حق بيان د لړم په ۹مه پژواک خبري اژانس ته وويل چې د زابل او غزني ولايتي شورا ګانو او ولسي جرګې غړو د پېښې له رامنځ ته کېدو وروسته د ستونزې د هواري لپاره هڅې پيل کړې دي.

کلات (پژواک، ٢٤ وږى ٩٤): د کابل- کندهار د لويې لارې مسافرين، موټر چلوونکي او د زابل ولايت يو شمېر اوسېدونکي وايي چې دغه لاره ډېره خرابه شوې چې له امله يې ترافيکي پېښې او د خلکو مرګ ژوبله زياته شوې ده.
د دوى په خبره چې پر دې لاره د بار وړونکو موټرو بې کنټروله تګ، د سړک د غاړې ماينونه، جګړې او طبيعي پېښې هغه عوامل دي چې سړک يې خراب کړی او د ترافيکي پېښو د زياتېدو لامل شوي دي.
د زابل چارواکي هم د خلکو دغه ستونزې پر ځای بولي او وايي چې د کابل- کندهار د لويې لارې د بيارغونې خبره يې د افغانستان د ټولګټو چارو له وزارت سره شريکه کړې او هيله لري چې بوديجه به ورته ځانګړې شي.

کلات (پژواک، ١٠ چنګاښ ٩٤): د زابل د ولايتي شورا منشي وايي چې د کار له پيله راهيسې په بېلابېلو برخو کې ګڼې لاسته راوړنې لري خو زياتوي چې لا هم د خلکو ټولو هيلو ته يې ځواب نه دى ويلى.
د دوى په خبره چې خراب امنيتي حالت او د مالي امکاناتوکموالی هغه ستونزې دي چې د دوى کارونه يې له خنډ سره مخ کړي خو دوى لا هم خپلې هڅې جاري ساتلې دي.
د زابل د ولايتي شورا منشي اسدالله کاکړ له پژواک خبري اژانس سره په مرکه کې وويل چې د ولايتي شورا لويه لاسته راوړنه د دغه ولايت د مېشتو بېلابېلو قومونو ترمنځ د يووالي او همغږۍ رامنځ ته کول دي.

دويم تعقيب - کلات (پژواک، ٤ غبرګولى ٩٤): چارواکي وايي چې د زابل په مرکز کلات ښار کې د ولايتي شورا پر ودانۍ شوي ځانمرګي بريد کې د ولايتي شورا د څلورو وکيلانو په ګډون ٦٨ تنه ټپيان شوي دي.
دغه ځانمرګى بريد نن (د غبرګولي ٤مه) له غرمې مخکې شاوخوا پاو باندې يوولس بجې په کلات ښار کې د ولايتي شورا مخې ته شوى دى.
د زابل مرستيال والي مسعود بختور پژواک خبري اژانس ته وويل چې ځانمرګي بريدګر له چاودېدونکو توکو ډک مازدا موټر ته د ولايتي شورا مخې ته چاودنه ورکړې ده.
د هغه د لومړنيو معلوماتو له مخې، په دغه بريد کې يو شمېر کسان ټپيان شوي چې ډېرى ملکي وګړي او دولتي مامورين دي.

کلات (پژواک،٢١غويى٩٤): د ٣١ تښتول شوو مسافرو له ډلې څخه ١٩ تنه يې نن سهار خوشې شول او د پاتې نورو د خلاصون هڅې روانې دي.
دغه څرګندونې د زابل د ولايتي شورا رييس عطا جان حق بيان، نن پژواک خبري اژانس ته وکړې.
ده وويل، دغه ١٩ تنه مسافر نن سهار شاوخوا ٩ بجې د غزني ولايت د جاغوريو ولسوالۍ له مربوطاتو څخه خوشې شوي دي.
نوموړي، په دې اړه نور جزئيات ورنه کړل.
تراوسه د دولت وسله والو مخالفينو په دې اړه څه نه دي ويلي.

کلات ( پژواک، ١٧ ورى ٩٤ ) : د زابل د ولايتي شورا رييس وايي چې له ٣١ تښتول شويو کسانو څخه يې يو تن په خپل مرګ مړ شوى او بل يې تښتوونکو وژلى دى.
دغه ٣١تنه ناپېژاندو وسله والو د ١٣٩٣ لمريز کال د کب په ٤مه د کابل-کندهار له لويې لارې وتښتول او برخليک يې تر اوسه هم نه دى معلوم.
ويل کېږي، چې تښتول شوي کسان د زابل په خاک افغان او ارغنداب ولسواليو کې ساتل شوي ، دولتي ځواکونو په لومړي سر کې خاک افغان ولسوالۍ کې عمليات ترسره کړل، خو دغه عمليات ناڅاپه ودرول شول او لامل يې معلوم نه شو.

کلات (پژواک، ١٢ کب ٩٣ ): چارواکي وايي چې زابل ولايت کې د تښتول شويو کسانو د ژغورنې په موخه پيل شويو عملياتو کې تر اوسه ٦٠ وسله والو ته مرګ ژوبله اوښتې ده.
ناپېژاندو وسله والو تېره اوونۍ د زابل ولايت د شاه جوى ولسوالۍ د پښ کندې سيمې له يوه ٣٠٣ موټر څخه ٣٠ تنه مسافر تښتولي دي.
ځايي چارواکو ويلي وو،دا کسان چې تازه له ايران څخه راستانه شوي وو، د غزني پيما ترانسپورټي شرکت په يوه ٣٠٣ موټر کې له هرات څخه کابل ته پر لاره وو.
د زابل د ولايتي شورا رييس حاجي عطاء جان وايي چې له تېرې نيمې شپې راهيسې ددې ولايت په خاک افغان ولسوالۍ کې عمليات پيل شوي دي.

کلات (پژواک، ٢٥ سلواغه ٩٣): د زابل د ولايتي شورا يو شمېر غړو د سيمه ييزو ارګانونو خپلواکې ادارې مشرانو سره د ليدنې پر مهال په ولايتي اداره کې د اصلاحاتو غوښتنه وکړه.
د سيمه ييزو ارګانونو د خپلواکې ادارې وياند تواب غورځنګ د سلواغې په ٢٥مه، پژواک خبري اژانس ته وويل چې د زابل د ولايتي شورا مشر عطاجان او د شورا يو شمېر غړو، نن د سيمه ييزو ارګانونو د خپلواکې ادارې د پاليسۍ او تخنيکي چارو مرستيال فريد ماموندزي سره وکتل.
هغه زياته کړه، چې د زابل د ولايتي شورا پلاوي د دې ليدنې پر مهال د خپل ولايت په اداره کې د اساسي اصلاحاتو غوښتنه وکړه.

کلات (پژواک، ٢٥ سلواغه ٩٣): د زابل لسګونه مېرمنې د دغه ولايت د ښځو چارو رياست مخې ته د لاريون په ډول راټولې شوې وې او د ښځو د ژوند د خويتوب غوښتنه يې کوله.
دوى ويل چې په دغه ولايت کې د ښځو پر وړاندې د تاوتريخوالي پېښې ډېرې شوې، خو دولت يې د مخنيوي لپاره تر اوسه کوم اقدام نه دى کړى.
يادو ښځو، چې نن (د سلواغې ٢٥مه) د دغه ولايت د ښځو چارو رياست مخې ته راټولې شوې وې، د خپلو حقوقو د غوښتنې شعارونه يې ورکول او په پرونۍ پېښه کې يې د دريو مېرمنو وژنه د تاوتريخوالي ښکاره بېلګه بلله.