Jowzjan

شبرغان (پژواک ١٢ کب ٩٣): جوزجان ولايت کې د طوطا سنګ په نوم يوه سيک نن د اسلام دين ومانه او ديني عالمانو پرې د عبدالرحمن نوم کېښود.
 هغه له مسلمانېدو وروسته وويل، چې دوه کاله وړاندې له هندوستان څخه شبرغان ولايت ته راغلى او له کلونو راهيسې يې فکر کاوه چې بايد د خپل ځان لپاره يو بشپړ او رښتينى دين وټاکي.
 هغه زياته کړه، چې په دې فکر کې دوه زړى و او نه پوهېده چې کومه لار وټاکي، عيسوي شي او که اسلام وټاکي نو په پاى کې له ډېرې مطالعې وروسته يې د اسلام دين د دونيا او اخرت د برياليتوب يواځينۍ لار وبلله او له همدې امله يې دغه دين ټاکلى دى.

شبرغان (پژواک، ٢٥ سلواغه ٩٣): د جوزجان ځايي چارواکي وايي چې وسله والو يو ښوونکى وژلى، خو وسله وال ادعا کوي چې دغه کس د اربکيانو قوماندان و.
د جوزجان امنيه قوماندان مل پاسوال فقيرمحمد جوزجاني پژواک خبري اژانس ته وويل چې د فيض اباد ولسوالۍ د ګرجګ منځني ښوونځي ښوونکى خان محمد تېره شپه د وسله والو طالبانو له خوا وژل شوى دى.
هغه زياته کړه چې د دوى څېړنې پيل شوې، خو تر اوسه څرګنده نه ده چې وسله والو مخالفينو ولې دغه کار کړى دى.

شبرغان (پژواک ٢٠ سلواغه ٩٣): جوزجان ولايت کې يوه مېرمن چې ډله ييز جنسي تېرى پرې شوى؛ ګواښ کوي چې که چېرې پر هغې باندې د تېري کولو عاملين ونه نيول شي او سزا ورنکړل شي نو ځان وژنه به وکړي.
دغه پېښه پرون شپه د جوزجان مرکز شبرغان ښار په اړوند يوه کلي کې رامنځته شوې ده.
د يادې ١٧ کلنې مېرمنې يوه خپلوان چې له نوم اخيستو يې ډډه کوله وويل، چې هغه د ٨ مياشتو مينداواره هم ده او د پنځو کسانو له لوري ورباندې تېرى شوى دى.
هغه پژواک خبري اژانس ته وويل، چې هغه د تېري کوونکو له لوري ډبول شوې هم ده او تيري کوونکو د هغې د سرو زرو ګوتې، لاکټ او لښتۍ هم له ځانونو سره وړې دي.