Special Reports

نيلي(پژواک، ٩ سلواغه ٩٢): دايکنډي دهېواد له نويو تاسيس شويو ولايتونو څخه دى او تر اوسه يې د کانونو د کشف لپاره تخصصي سروې نه ده شوې، خو ځايي سروې ګانې څرګندوي، چې په دې ولايت کې د مسو کانونه په زياته کچه شتون لري.
دايکنډي د هېواد له مرکزي ولايتونو څخه دى او تر دې وړاندې د اروزګان ولايت له ولسواليو څخه يوه وه او په ١٣٨٤ لمريز کال کې د ولايت کچې ته اوچت شو.
په دې ولايت کې د کانونو رياست نه شته او په تازه ډول يې تشکيلات منظور شوي ، خو تر اوسه يې خپل فعاليت نه دى پيل کړى.

نيلی (پژواک ٢لړم ٩٢) : دايکنډي ولايت له هلمند، اروزګان، غور او غزني ولايتونو سره ګډه پوله لري او له لوړو امنيتي ننګونو سره مخ دى، په وروستيو کلونو کې څو ځله پرې د اروزګان له چارچينو، د غور له پسابند او د هلمند له باغران ولسواليو څخه وسله وال بريدونه شوي دي.
د امنيتي ګواښونو له اړخه د دايکنډي تر ټولو زيانمنې ولسوالۍ له کجران، کيتي او سنګ تخت بندر ولسواليو څخه عبارت دي، چې له هلمند او اروزګان سره ګده پوله لري.

نيلي(پژواک،۳۰ تله ٩٢): د دايکنډي ولايت ډېرى اوسېدونکي په دغه ولايت کې د بيارغونې په سست بهير سخته نيوکه کوي او د ټول ګټو پروژو د پلي کولو غوښتونکي دي،خو ځايي چارواکي وايي، چې د شپېتو ميليونو ٦٠ ډالرو په ارزښت پروژې تر لاس لاندې لري، چې د دايکنډي هوايي ډګر هم په کې دى.
خلک وايي، چې ددې ولايت مرکز يوه کوچني بازار ته ورته دى، ځينې دولتي ودانۍ په کې جوړې شوي، خو د عامه ګټو پروژې په کې نه تر سترګو کېږي.
د دوى په خبره ، خلک تراوسه پورې پوخ سړک نه پېژني، برېښنا نه شته له همدې امله د پوهنې او روغتيا په برخه کې هم خلکو ته اسانتياوې نه دي رسېدلي.

نيلی (پژواک ۳۰ تله ٩٢): د دايکنډي د پوهنې چارواکي وايي، چې په وروستيو کې د دغه ولايت پوهنيز بهير ښه پرمختګ کړى، خو خلک بيا په دې برخه کې د ښوونځيو د ودانيواو مسلکي ښوونکو له نه شتونه شکايت کوي.
د دايکنډي د پوهنې رييس محمد علي واثق وايي، چې د پوهنې په برخه کې ګڼې ستونزې وې، خو په وروستيو څو کلونو کې دغه ستونزې کمې شوې، زده کوونکو او ښوونکو ته غوره اسانتياوې برابرې شوې دي.

دا چې دايکنډي ولايت يو نوى تشکيل شوى ولايت دى، پانګونې په کې چندان وده نه ده، يواځې په نيلي ښار کې يو کوچنى بازار شته، خو خلک يې خپلې اړتياوې د غزني، کابل او کندهار له ښارونو پوره کوي.
داسې يو شرکت يا عمده پلورنځى هم په دغه ولايت کې نه ښکاري، چې ولسواليو ته سوداګريز توکي چمتو او و رسوي.
د خصوصي سکتور په برخه کې ٤٢ کورنۍ او بهرنۍ موسسې، د کابلبانک يوه څانګه ، اته ودانيز شرکتونه، د تېلو ٣٠ سوداګريز ټانکونه او څلور مخابراتي شبکې فعالې دي، چې دغير دولتي سکتور ټولې سوداګريزې او پراختيايي برخې را نغاړي.